Касым Тыныстановдун араб арибинде жазган айрым эмгектери

Кыргыз элинин чыгаан уулу, коомдук жана мамлекеттик ишмер, белгилүү агартуучу, талантуу окумуштуу, акын жана драматург Касым Тыныстановдун өмүр жолу, аянычтуу тагдыры, чыгармачылыгы, илимий жана педогогикалык эмгектери, коомдук, саясий, маданий ж.б. көп кырдуу ишмердиги тууралуу акыркы эле отуз жылда жүздөгөн материалдар жарык көрсө да, анын жасап кеткен улуу иштери жөнүндө алдыда айтыла турчу дагы далай кеп-сөз бар экендиги талашсыз. Андыктан, эң биринчи кезекте, анын жазып калтырып кеткен эмгектерине этияттык менен мамиле кылуу жана китепкананын архивдеринде эскирип, жыртылып керектен чыга баштаган китептеринин түп нускаларын жоготпой толугу менен сактап калуу учурдун талабы. Ушул максат менен даярдалган бул китепте анын мурастарынын ичинен кыргыз тили менен байланыштуу окуу-усулдук мүнөздөгү "Окуу китеби" (1924), "Окуу-жазуу бил" (1927), "Биздин тил" (1927) аттуу араб ариби менен жазган айрым эмгектеринин факсимилелерине орун берилди. Түркиянын Анкара шаарындагы Графикер басма үйүнүн колдоосу менен жарык көргөн бул китеп Касым Тыныстановдун жаркын элесине жана 120 жылдык мааракесине арналат.