Касым Тыныстановдун латын арибинде жазган айрым эмгектери

Кыргыз элинин чыгаан уулу, коомдук жана мамлекеттик ишмер, белгилүү агартуучу, талантуу окумуштуу, акын жана драматург Касым Тыныстановдун өмүр жолу, аянычтуу тагдыры, чыгармачылыгы, илимий жана педогогикалык эмгектери, коомдук, саясий, маданий ж.б. көп кырдуу ишмердиги тууралуу акыркы эле 30 жылда жүздөгөн материалдар жарык көрсө да, анын жасап кеткен улуу иштери жөнүндө алдыда айтыла турчу дагы далай кеп-сөз бар экендиги талашсыз. Андыктан, эң биринчи кезекте, анын жазып калтырып кеткен эмгектерине этияттык менен мамиле кылуу жана китепкананын архивдеринде эскирип, жыртылып керектен чыга баштаган китептеринин түп нускаларын жоготпой толугу менен сактап калуу учурдун талабы. Ушул максат менен даярдалган бул китепте анын мурастарынын ичинен кыргыз тили менен байланыштуу окуу-усулдук жана илимий мүнөздөгү "Эне тилибиз" (1931), "Тил сабагы" (1932) жана илимий (орфографиялык) мүнөздөгү "Кыргыздын адабий тилинин жаңы имласынын долбору" (1934), "Кыргыз тили имласынын маселелери" (1936) аттуу латын ариби менен жазган айрым эмгектеринин факсимилелерине орун берилди. Түркиянын Анкара шаарындагы Графикер басма үйүнүн колдоосу менен жарык көргөн бул китеп Касым Тыныстановдун жаркын элесине жана 120 жылдык мааракесине арналат.